Regskenner

Transportakte van 30 jaar gelede

Vraag

My pa het so 30 jaar terug 'n plaas verkoop, maar 'n 10ha-gedeelte (serwituut) het nie deel uitgemaak van die verkoop nie. Hoe en waar gaan ek uitvind of dit nog geldig is en/of die huidige eienaar bewus is daarvan en/of daar 'n verskil in grootte is tussen die oorspronklike koper en al die ander daarna?

Antwoord

As ‘n verkoper sy plaas verkoop laat die wet hom toe om in daardie selfde transportakte waarin hy die eiendom aan die koper oordra, ‘n reg in die vorm van ‘n serwituut, aan homself (die verkoper), terug te hou.

As dit ‘n registreerbare serwituut, soos ‘n pad of pypleiding was, behoort jy dit te kan sien in daardie transportakte van 30 jaar gelede wat steeds in die Aktekantoor gehou sal word. Jy kan daarmee saam ook die nuwe eienaar se transportakte nagaan.

‘n 10ha serwituut klink egter vreemd, tensy dit byvoorbeeld ‘n pad was waarvan die totale grootte 10 hektaar was. Maar jou pa sou nie ‘n serwituut van 10 hektaar oor die grond wat hy oordra,  byvoorbeeld vir boerdery, of om op te woon, kon terughou nie, want dit sou dalk na 1970 op die onderverdeling van landbougrond neerkom waarvoor die Minister se goedkeuring deur die wet vereis word.

Jy noem egter nie die rede waarvoor die 10 hektaar “serwituut” teruggehou was nie en dus kan ek nie met sekerheid aandui of jy wel die “serwituut” sal kan opspoor en of dit inderdaad ‘n registreerbare serwituut in terme van die wet was nie. As jy meer inligting voorsien, kan ons dalk nader aan ‘n antwoord kom.

Geskryf deur: Butch van Blerk (butch@billtolken.co.za)

23 Januarie 2012


Lewer kommentaar

Slegs in Afrikaans

Los 'n antwoord

Alle velde moet ingevul word.

Teken In

Ek het nie 'n rekening nie. Ek moet een skep.


Ek het my wagwoord vergeet X

Registreer

Het jy reeds 'n profiel? Teken asseblief in.


X